Salib yang Tara Ada Gagang| Refleksi dari buku Tidak Ada Gagang Pada Salib - Kosuke Koyama

“Salib yang Tara Ada Gagang”

(Refleksi dari buku Tidak Ada Gagang pada Salib – Kosuke Koyama)

Salib itu tarada gagang...

Tarada tampa untuk torang pegang dengan nyaman 

Tarada tali yang bisa torang kase ika kong taruh di bahu

Kar'na salib itu bukan beban yang torang pilih 

tapi panggilan yang harus torang hidupi.

Yesus tara pilih salib kar'na Dia kuat

Tapi kar'na Dia pe cinta yang talalu dalam 

Sampe Dia tara mau cuma tinggal babadiam saja.

Dia bajalang, tertatih, terluka

Tapi Dia tara pernah berenti mencintai

Torang saat ini hidup di dunia yang suka dengan segala sesuatu yang capat

Sagala hal yang praktis dan instan.

Sayangnya, salib Yesus itu tara mengenal kata “instan”

Salib itu tara bisa torang bawa pake oto

Tara bisa juga torang kase kurang depe barat.

Salib harus dipikul..

Perlahan dengan torang pe tubuh yang ringkih ini 

Deng aer mata 

Deng hati yang tetap mencintai walaupun torang rasa sakit.

Di torang pe sekitar ini, ada banyak salib yang tara terlihat.

Ada mama-mama yang batahang lapar supaya depe anak dapa makan.

Ada papa-papa yang tara berenti bakarja, biar kata ujang, 

walaupun torang lia depe kondisi fisik so tara kuat.

Ada anak-anak yang paksa senyum, padahal dia tara pernah dapa polo deng tara dapa cinta dari depe orangtua.

Dorang samua ada sementara pikul salib tanpa gagang.

Kong torang?

Apakah torang hanya jadi penonton dari jauh, 

atau torang mau iko bajalang sama-sama deng dorang?

Kosuke Koyama bilang jalan salib itu bukan untuk torang tonton saja. 

Jalan salib itu ada untuk torang jalani, 

Sama-sama deng dorang yang jatuh, yang dikhianati dan dilupakan.

Salib tanpa gagang itu pangge pa torang bukan untuk jadi pahlawan, tapi untuk jadi tamang.

Menemani, memeluk, mendengar, deng manangis sama-sama.

Kar'na di situlah kasih bisa jadi nyata.

Dan di situlah torang menemukan Kristus,

Bukang di tampa yang tinggi, tapi di tanah—di tengah-tengah abu dan luka manusia. (ats)